貓展

今日同老婆大人去咗九龍灣睇寵物用品展。預咗要俾入場費，我地純粹去逛吓。

去到國際展貿，到處都係大狗細狗，狗狗特登出嚟同大家聚會。一入場，見到除咗有用品展外，原來仲有個貓展，三十蚊就可以去晒兩個show。於是我哋就俾咗六十蚊入去睇吓。

入咗去貓展先。嘩！到處都係執到靚晒既貓貓！於是我哋就逐個籠去睇。望住一隻二隻靚仔靚女，不時諗起我哋屋企既寶貝BelleB。不過再睇真D，好多隻都係响個籠入面瞓覺，好似唔係好開心。試想像吓，你屋企帶你嚟到一個地方，放你响個位度坐。突然間聞到一陣怪味！原來隔離坐咗隻大舊！你好似唔識得佢喎。望吓另外一邉，又有隻好囂咁周圍望。佢哋我都唔識既？坐吓坐吓，都唔知响度做咩。之後有D廣播，爹哋媽咪就抱走我。佢哋放咗我响另外一個籠，同埋另外五六個同胞一齊。以為咁就算，點之仲有個大嬸走過嚟抱起我，將我全身都摸勻！（非禮呀！）嚇到我騰騰震。玩咗幾round呢D嘢之後，我就番咗我個籠到休息。咁就一日，都唔知做咩…

見到好多靚貓貓，我哋當然好開心。但當見到佢哋對呢個比賽玩意唔係咁熱衷之際，而佢哋既爹哋媽咪就好緊張。究竟呢種比賽對貓貓本身有無意義？佢哋又有無關心到呢？

我屋企嗰四隻從來都無攞過任何奬。但我哋就知道：响我哋既心目中，佢哋四隻係世界上最靚既貓貓。無人知？有咩所謂？