Bye bye Laughing 哥

雖然我今晚食o左D澳洲芝士，好好味，但係無論如何都係要講o下阿Laughing哥。因為今晚Laughing哥響電視劇集「學警狙擊」裏面，o岩o岩因公殉職，俾條茂利射瓜o左。

番o左o黎香港，真係連電視都睇多o左。我已經盡量唔睇八卦同連續劇，點知呢個謝天華做個大配角做得咁成功，風頭絕對搶盡：兩條黃毛主角，同一條影硬照無敵，但戲味有限o既中坑。謝生靚仔就講唔上，但係正因佢好似爛躂躂咁，以為佢做梗古惑仔啦？點知原來係翻版陳永仁。攪到連冇咩追戲癮o既我都要睇o下先。好慶幸今晚親自目睹電視上Laughing哥中槍呢一幕，然後來個同聲一哭，為Laughing哥送行。

唔講可能你未必知，直到現時為止，在facebook內的Laughing哥專頁，已經有成七萬六人係佢fans，如果拖晒馬出街，一D都唔野少；而為了今晚Laughing哥在熒光幕上死去而留言的，已累積到成三千幾個。呢到可以睇到幾點：

1。真係好多人鐘意Laughing哥
2。雖然現今資訊媒體如此發達，但係依然有唔少人睇電視劇，至少今晚有唔少人捧Laughing哥場
3。原來呢班人當中，有好多都同我一樣，響樹一心多用，心不在焉咁一路上網一路做其他野，例如睇o下Laughing哥。悲觀D o黎睇，就係傳統媒體沒落lu，套戲都吸引唔到D人聚精會神去睇；相反樂觀咁睇，傳統媒體好得喎，仲可以增取到咁多觀眾支持。
4。伸延上一點。同步在網上同其他人討論劇情，攪到自己同人地好鬼有共鳴。所以：電視+慣性收視+網絡媒體，原來可以殺出一條新血路。

點解咁多人鐘意Laughing哥呢？有人話佢忍辱負重，係做大事o既人；有人話佢痴心情長劍；有人覺得佢似自己，明知眼前個篤係大野，你老細依然叫你去三年又三年。總之，好o既故事同角飾有趣之處，就係成個故事已經講完俾你聽，但你卻可以再三細味，去認同，或者唔認同。

呢個，就係睇故仔同寫故仔o既魅力所在。